Baunar enn á Souness

Craig Bellamy vísar því alfarið á bug að hann sé maður sem hafi slæm áhrif á þau lið sem hann hefur spilað fyrir á ferlinum eins og fyrrum knattspyrnustjóri hans Graeme Souness gaf til kynna þegar hann setti hann í skammarkrókinn hjá Newcastle á sínum tíma. Bellamy hefur verið lykilmaður spútnikliði Blackburn í vetur og segist ekki skilja orð fyrrum knattspyrnustjóra síns.

"Mér þótti ég nú ekki tapa áttum þegar ég var hjá Newcastle og ég man ekki betur en að ég hafi verið á meðal markahæstu manna þegar ég fór þaðan til Celtic á sínum tíma," sagði Bellamy og benti á að árangur liðanna sem hann hefur spilað fyrir bendi til annars en að hann sé að skemma fyrir þeim.

"Þegar ég var hjá Newcastle höfnuðum við í þriðja, fjórða og fimmta sæti og sjáið bara hvar Blackburn er í dag. Já, það er aldeilis að ég er að skemma fyrir gengi liða minna," sagði Bellamy kaldhæðnislega eftir að hann hafði skorað bæði mörk sinna manna gegn Portsmouth um helgina.