Fowler þarf að bæta sig

Rafa Benitez hefur gefið ákveðnar vísbendingar um að hann muni ekki framlengja samninginn við framherjann Robbie Fowler þrátt fyrir að hann hafi skorað mark í þremur síðustu leikjunum sem hann hefur verið í byrjunarliði Liverpool.

"Enginn efast um hæfileika hans, en ég er að hugsa um næsta tímabil og velta því fyrir mér í hvernig formi hann verður þá. Ef ég gæti fundið 23 ára gamlan strák með hraða og tækni á borð við þá sem Fowler hefur, yrði ég væntanlega að skoða það nánar," sagði Benitez, sem er duglegur að benda á það að Fowler sé alls ekki í nógu góðu líkamlegu formi þó hann sé duglegur að skora.

"Þetta snýst ekki um það að við trúum ekki á Robbie, ástríða hans er virkilega góð fyrir okkur. Við erum hinsvegar stór kúbbur sem þarf í mörg horn að líta og verðum því að taka stöðuna reglulega og sjá hvað við getum gert til að bæta okkur. Robbie þarf að bæta sig á sumum sviðum af því hann hefur ekki spilað mikið undanfarið," sagði Benitez.