Við höfum þaggað niður í gagnrýnendum okkar

Sir Alex Ferguson er í skýjunum yfir árangri Manchester United á síðustu misserum og segir að gengi liðsins síðan það vann deildarbikarinn á dögunum hafi sannarlega nægt til að þagga niður í gagnrýnisröddunum sem gengu svo langt að vilja reka Ferguson á sínum tíma.

"Við létum ekki mótlætið hafa áhrif á okkur og settum undir okkur hausinn eins og menn gera á Old Trafford. Frammistaða liðsins undanfarið hefur verið frábær, við höfum leikið sóknarknattspyrnu sem hefur borið árangur," sagði Ferguson og bendir á tvennt sem hafi lagt grunninn að sigurgöngunni undanfarið.

"Í fyrsta lagi var það sigurinn í bikarnum. Hann hleypti anda í mannskapinn. Svo var það að ná jafnvægi á miðjunni með þeim Ryan Giggs og John O´Shea. Þá má ekki gleyma því hvað framlínan okkar hefur verið iðin við að skora mörk," sagði Ferguson og spáir því að þó flest bendi til þess að Chelsea landi titlinum í ár, verði baráttan á næsta tímabili gríðarlega hörð.