Öruggur sigur Chelsea

Chelsea vann í dag öruggan 3-0 sigur á Everton á heimavelli sínum Stamford Bridge og er því komið með aðra höndina á Englandsbikarinn annað árið í röð. Frank Lampard, Didier Drogba og Michael Essien skoruðu mörk Chelsea í dag, en Lee Carlsley var rekinn af leikvelli hjá Everton í upphafi síðari hálfleiks í stöðunni 1-0 fyrir Chelsea.

Portsmouth var á góðri leið með að krækja í enn einn sigurinn í fallslagnum þegar liðið hafði yfir lengst af á útivelli gegn Hermanni Hreiðarssyni og félögum í Charlton, en heimamenn gerðu út um vonir Portsmouth með tveimur mörkum seint í leiknum.

Middlesbrough lagði West Ham 2-0 með mörkum frá Hasselbaink og Maccarone og þá steinlá Sunderland 4-1 á heimavelli sínum gegn Newcastle.