EDGE í notkun á fleiri stöðum

Og Vodafone hefur eflt farsímakerfi sitt en frekar í kringum höfuðborgarsvæðið með því að taka í notkun EDGE tækni sem gerir viðskiptavinum í farsímaþjónustu fyrirtækisins mögulegt að nota símtæki sín með fjölbreyttari og hraðvirkari hætti en áður. Nú hefur Og Vodafone lokið við uppsetningu á EDGE sambandi frá Úlfarsfelli við Mosfellsbæ og að Grundarhverfi á Kjalarnesi.

Í tilkynningu frá Og Vodafone segir að núverandi EDGE svæði fyrirtækisins nái um allt höfuðborgarsvæðið, í Mosfellsdal og að Grundarhverfi. Þá hefur Og Vodafone tekið EDGE í notkun á Akureyri og víðar.

Með tilkomu EDGE (Enhanced Data Rates for Global Evolution) margfaldast afkastageta í GSM kerfi Og Vodafone. Að sögn Gísla Þorsteinssonar, upplýsingafulltrúa Og Vodafone, er m.a. hægt að nota Vodafone BlackBerry, Vodafone Mobile Connect gagnakort fyrir fartölvur og Vodafone live!, með enn auðveldari hætti en áður. Vodafone live! gerir notendum kleift að sækja sér myndskeið af mörkum úr ensku úrvalsdeildinni og Meistaradeild Evrópu í knattspyrnu, hágæða leiki, MP3 hringitóna, fréttir og annars konar afþreyingarefni með meiri hraða og í betri gæðum en áður hefur þekkst.

Flutningshraði í EDGE er í raun mismunandi hvað fjarlægð frá sendum varðar og milli einstakra farsíma en tæknin er allt að því 240 Kb/s í kerfi Og Vodafone. Til þess að geta notfært sér EDGE þurfa GSM notendur að hafa farsíma sem styðja slíka tækni. Til samanburðar er flutningshraði GPRS tækni (General Packet Radio Service), sem Og Vodafone hefur hingað til notað fyrir afþreyingu og tölvupóstsamskipti í gegnum farsíma, í kringum 52 Kb/s.