Shearer ætlar að taka sér gott frí

Framherjinn Alan Shearer ætlar ekki að vinna sem þjálfari hjá liði Newcastle á næsta keppnistímabili þegar hann verður búinn að leggja skóna á hilluna, heldur ætlar hann að taka sér frí frá knattspyrnu í óákveðinn tíma.

Eins og fram hefur komið í fréttum í dag gæti verið að Shearer hefði spilað sinn síðasta leik fyrir Newcastle eftir að hann meiddist í síðasta leik, en hann hefur engu að síður ákveðið að taka sér gott frí eftir að tímabilinu lýkur.

"Ég hef mikinn áhuga á að snúa mér að þjálfun í framtíðinni og er að ljúka við að verða mér út um próf upp á það. Ég ætla hinsvegar að taka mér frí í nokkur ár áður en ég fer út í það og njóta lífsins," sagði Shearer.