Hugsaði tvisvar um að hætta

Jose Mourinho hefur viðurkennt að hann hafi í tvígang hugsað alvarlega um að láta af störfum sem knattspyrnustjóri Chelsea í vetur. "Ég hugsaði tvisvar um að fara út og skella á eftir mér, því ég naut mín ekki í starfinu. Þetta þýðir þó ekki að ég snúi ekki aftur á næstu leiktíð," sagði hann.

Mourinho hefur átt stormasamt samband við blaðamenn síðan hann kom til Englands. "Ég mæti stundum ekki á blaðamannafundi af því ég hef enga ánægju af þeim. Mér finnst ég stundum vera önnur persóna hér á Englandi en í Portúgal - en það er kannski eitthvað sem ég þarf að aðlagast betur. Ég held að Chelsea eigi skilið að fá meiri virðingu en félagið fær í dag - og ef það gerist, fara menn ef til vill að njóta sín betur," sagði Mourinho og bætti við að honum væri ekki í nöp við einn eða neinn í kring um starf sitt.