Mike Miller besti varamaðurinn

Mike Miller, leikmaður Memphis Grizzlies, var í gærkvöld kjörinn besti varamaðurinn á tímabilinu í NBA deildinni með nokkuð miklum yfirburðum. Miller skoraði 13,7 stig og hirti 5,4 fráköst að meðaltali í leik í vetur, en hann var færður á varamannabekkinn í upphafi leiktíðar þegar Mike Fratello þjálfari breytti uppstillingu sinni til að ná meiru út úr liðinu. Það heppnaðist einstaklega vel og var Miller lykilmaður liðsins áfram þó hann kæmi af bekknum.

Goðsögnin Jerry West, sem er forseti Memphis, hrósaði Miller fyrir hæversku sína og vinnusemi. "Mike Miller duglegasti leikmaður sem ég hef séð á ævi minni." Miller verður í eldlínunni með Memphis á Sýn í kvöld þegar liðið reynir að næla sér í fyrsta sigurinn í sögu félagsins í úrslitakeppni gegn Dallas.