Tilbúinn að gefa Englendingunum frí

Jose Mourinho segist hafa boðist til að hvíla þá John Terry, Frank Lampard og Joe Cole í þeim leikjum sem eftir er í ensku úrvalsdeildinni svo þeir verði frískir þegar kemur að HM í sumar. Þá er fyrirhugað að Shaun Wright-Phillips fái að spila eitthvað í síðustu leikjunum með Chelsea svo hann verði í betri leikæfingu, en talið er víst að hann eigi sæti í HM hópnum.

"Ég á gott samstarf við Eriksson og bauð honum strax eftir leikinn við Manchester United að hvíla leikmennina í síðustu tveimur deildarleikjunum. Þeir geta þá farið í frí og slakað aðeins á svo þeir verði ferskir á HM," sagði Mourinho.