Rooney þarf kraftaverk til að ná HM

Sven-Göran Eriksson, landsliðsþjálfari Englendinga, hefur upplýst að fleiri en eitt bein í ristinni á Wayne Rooney hafi brákast í leiknum gegn Chelsea á dögunum og því þurfi ekkert minna en kraftaverk til að hann geti verið með á HM í sumar.

"Ég komst að því í gær að hann er með fleiri en eitt bein brákað í fætinum. Kraftaverkin gerast auðvitað stundum, en ég er ekki viss um að það eigi við hér. Ég mun hafa hann inni í myndinni hjá landsliðinu þangað til læknarnir segja mér að það sé engin von um að hann geti náð sér," sagði Eriksson.