Olíuverð lækkaði

Olíuverð lækkaði um rúman dal á helstu mörkuðum í dag í kjölfar þess að orkumálaráðuneyti Bandaríkjanna greindi frá því í vikulegri greinargerð sinni að olíubirgðir í landinu hefðu aukist. Þetta er annar dagurinn í röð sem olíuverð lækkar.

Verð á olíu, sem afhent verður í næsta mánuði, lækkaði um 1,18 Bandaríkjadali á mörkuðum í New York í Bandaríkjunum og stendur verðið nú í 71,10 dollurum á tunnu. Verðið lækkaði um 2,33 dali á markaðnum í gær.

Þá lækkaði jafnframt verð á Norðursjávarolíu á markaði í Lundúnum í Bretlandi um 1,02 Bandaríkjadali og stendur það í 71,63 dollurum á tunnu.

Árásir skæruliða á olíuvinnslustöðvar í Nígeríu og vaxandi spenna vegna kjarnorkuáætlunar Írana er ástæða þess að heimmarkaðsverð á olíu hefur hækkað síðustu vikurnar. Íranar framleiða mikið magn af olíu og gæti svo farið að þeir dragi úr framleiðslu sinni verði gripið til refsiaðgerða gegn þeim vegna kjarnorkuáætlana þeirra.