Toronto datt í lukkupottinn

Kanadaliðið Toronto Raptors í NBA deildinni datt heldur betur í lukkupottinn í gær þegar það hreppti fyrsta valréttinn í hinu árlega nýliðavali sem fram fer eftir um það bil mánuð. Dregið er úr lukkupotti um það hvaða lið hreppir hnossið hverju sinni, rétt eins og þegar dregið er í Lottóinu hérlendis og fá liðin úthlutað kúlum í pottinum eftir árangri í deildarkeppninni síðasta vetur.

Lið Portland Trailblazers hafnaði í neðsta sæti í deildarkeppninni í vetur átti þar af leiðandi flestar kúlur í pottinum þegar dregið var í nótt. Þrátt fyrir að 25% líkur hafi verið á að Portland fengi fyrsta valréttinn, var það Toronto sem datt í lukkupottinn þrátt fyrir að líkurnar á því væru aðeins um 8% - ekki ósvipað og þegar Milwaukee hreppti hnossið í fyrra. Aðeins þrjú lið með slakastan árangur í deildinni hafa fengið fyrsta valrétt síðan árið 1990.

Annan valrétt fær Chicago eftir að hafa fengið hann frá New York Knicks í skiptum fyrir Eddy Curry á sínum tíma. Charlotte velur númer þrjú, þá Portland og Atlanta fær fimmta valréttinn.

Ekki er búist við því að verði neinir stórlaxar á lausu í nýliðavalinu í ár, sem fram fer í New York þann 28. júní, en framherjinn Adam Morrison frá Gonzaga, miðherjinn LaMarcus Aldridge frá Texas-háskólanum og framherjinn Tyrus Thomas frá LSU, þykja allir koma vel til greina sem fyrsti valréttur.

1. Toronto

2. Chicago (frá New York)

3. Charlotte

4. Portland

5. Atlanta

6. Minnesota

7. Boston

8. Houston

9. Golden State

10. Seattle

11. Orlando

12. New Orleans

13. Philadelphia

14. Utah

15. New Orleans (frá Milwaukee)

16. Chicago

17. Indiana

18. Washington

19. Sacramento

20. New York (frá Denver í gegn um Toronto og New Jersey)

21. Phoenix (frá L.A. Lakers í gegn um Atlanta og Boston)

22. New Jersey (frá L.A. Clippers í gegn um Denver og Orlando)

23. New Jersey

24. Memphis

25. Cleveland

26. L.A. Lakers (frá Miami)

27. Phoenix

28. Dallas

29. New York (frá San Antonio)

30. Portland (frá Detroit í gegn um Utah)