Það er auðvelt að dekka Ronaldo

Robert Kovac, miðvörður króatíska landsliðsins í knattspyrnu, sagði að það hefði verið auðvelt að dekka brasilíska framherjann Ronaldo í leiknum í gærkvöldi og sagði að Ronaldo hefði verið fjarri sínu besta.

"Ég veit ekki hvað hefur komið fyrir hann. Hann hljóp ekkert og stóð bara kyrr fyrir framan okkur allan leikinn. Hann hlýtur bara að vera þreyttur, því hann snerti varla boltann í leiknum. Það var auðvelt að dekka hann í þessum leik - en ég hef þurft að hafa gætur á honum í leik áður og það var mjög erfitt, svo frammistaða hans í gær kom mér mjög á óvart," sagði Kovac hissa.