Framtíð friðargæslu í Líbanon óljós

Öryggisráð Sameinuðu þjóðanna fundaði bak við luktar dyr í dag til að ræða um framtíð alþjóðlegs friðargæsluliðs í Líbanon sem gæta bláu línunnar sem skilur Líbanon og Ísrael.

2000 friðargæsluliðar á vegum Sameinuðu þjóðanna hafa í 28 ár gætt landamæranna milli Líbanons og Ísraels, eða allt frá því að Ísraelar drógu sig út úr Líbanon árið 1978. Framtíð verkefnisins sem í daglegu tali er nefnt UNIFIL, er nú óviss, svo ekki sé meira sagt, þar sem heimild verkefnisins rennur út um næstu mánaðamót. Kofi Annan, framkvæmdastjóri Sameinuðu þjóðanna bað í gær um að verkefnið yrði framlengt um mánuð í viðbót. Stjórnvöld í Líbanon hafa ennfremur beðið um að UNIFIL njóti við í hálft ár til viðbótar.

Eftir fund öryggisráðsins í dag sagði sendiherra Frakklands gagnvart Sameinuðu þjóðunum að framtíð friðargæsluliðs í Líbanon ylti að verulegu leyti á niðurstöðum alþjóðlegra viðræðna um málefnið sem fram fara í Róm á morgun. Hann sagði þó að flestir væru þó að komast á þá skoðun að skynsamlegt væri að alþjóðlegt friðargæslulið gætti landamæranna milli Líbanons og Ísraels og styddi líbönsk stjórnvöld í að ná aftur stjórn á svæðinu og koma á friði og stöðugleika.

Friðargæsludeild Sameinuðu þjóðanna segist alls ekki hafa í hyggju að draga burt þá tæplega 2000 friðargæsluliða sem nú gæta bláu línunnar milli Líbanons og Ísraels, þrátt fyrir ofbeldið og miklar takmarkanir á ferðafrelsi friðargæslunnar.

Ekki virðist hins vegar vera samstaða um að auka við friðargæslulið í Líbanon. Flest ríki styðja það að fjölgað verði í friðargæsluliðinu en áhöld eru um hvaðan liðsstyrkurinn eigi að koma. Bandaríkjamenn hafa þvertekið fyrir að senda hermenn sína þar sem þeir telja að þeir myndu verða skotmörk Hisbollah. NATO, sem og Bretland þykjast hafa of mörg járn í eldinum til að hafa hermenn aflögu. Þjóðverjar og fleiri segjast eingöngu munu taka þátt í friðargæslu ef samþykki Hisbollah liggur fyrir eða ef áður hefur samist um vopnahlé.