Ekki binda refsiaðgerðir við tiltekinn frest

Chirac, Frakklandsforseti, sagðist í dag vera andvígur því að binda refisaðgerðir vegna kjarnorkuáætlunar Írana við tiltekinn frest. Hann sagði sig og Bush Bandaríkjaforseta á sömu skoðun um forsendur viðræðna við stjórnvöld í Teheran.

61. allsherjarþing Sameinuðu þjóðanna hófst í New York í dag. Báðir forsetarnir fluttu ávörp sín þar í dag. Chirac var spurður eftir ræðu sína hvað hann teldi að ætti að bíða lengi með refsiaðgerðir gegn Írönum fyrst þeir hætti ekki auðgun úrans. Hann sagði vesturvelin bundin því að reyna að semja um lausn og því þurfi að ræða málin. Því sé ekki rétt að setja einhver tímamörk í upphafi. Chirac sagðist vona að viðræðuferlið myndi skila árangri.

Í ræðu sinni sagði Bush Bandaríkjaforseti að hann virti Írana, sögu þeirra og menningu. Ekki væri hægt að horfa framhjá framlögum þeirra í gegnum aldirnar. Ráðamenn þar í landi hafi hins vegar valið að neita íbúum um frelsi og nota það fjármagn sem þeir hafi til umráða til að styðja hryðjuverkamenn og þróa kjarnorkuvopn. Auk þess ali ráðamenn í Íran á ofstæki og öfgastefnu.

Eftir ræðu sína sagði Bush mikilvægt að Íranar kæmu að samningaborðinu, ellegar yrðu þeir að taka afleiðingunum. Mahmoud Ahmadinejad, Íransforseti, sem ávarpar þingið í nótt, var ekki í salnum þegar Bush flutti sína ræðu.

Kofi Annan, framkvæmdastjóri Sameinuðu þjóðanna, flutti ávarp sitt við upphaf þingsins í dag. Hann gerði baráttuna gegn hryðjuverkum að umfjöllunarefni. Annan sagði hryðjuverk notuð sem ástæðu til að takmarka eða afnema grundvallar mannréttindi. Þar með sé gefið spila upp í hendurnar á hryðjuverkamönnum og hjálpa þeim að útvega nýliða. Annan staldraði ekki við þar og sagði alþjóðavæðunga auka hættuna á því að bilið milli ríkra og fátækra breikki en frekar þegar hafi orðið.