Bandaríska liðið spilaði ömurlega

Bandaríski kylfingurinn Jim Furyk hefur vísað þeim kenningum á bug að lið Bandaríkjanna hafi tapað í Ryder-bikarnum vegna þess að það skorti hungur. Furyk segir liðið einfaldlega hafa tapað fyrir því evrópska af því það hafi spilað ömurlegt golf alla keppnina.

"Ef þú hefur ekki hungur til að vinna Ryder bikarinn er augljóst að þú ert ekki með lífsmarki, svo ég hlusta ekki á slíka vitleysu. Við töpuðum í keppninni af því við spiluðum ömurlega og vorum burstaðir á öllum sviðum og þurfum sannarlega að bæta okkur," sagði Furyk í samtali við blaðamenn á Englandi.

"Einn blaðamaðurinn spurði mig hreint út hvort ég kærði mig kollóttan um gengi liðsins - hvort það skipti mig í raun og veru máli. Mig langaði mest að kyrkja hann, en svaraði honum játandi, beit í tunguna og gekk á brott móðgaður," sagði Furyk, en gárungarnir vildu meina að menn úr röðum bandaríska liðsins hefðu hugsað meira um eigin hag en liðsins á mótinu.