Tveggja-Jagúara Prescott hættir

John Prescott, aðstoðarforsætisráðherra Bretlands, baðst í dag afsökunar á að hafa svikið Verkamannaflokkinn, og tilkynnti að hann myndi segja af sér innan árs. Prescott hefur verið mikið í fréttum í Bretlandi undanfarin misseri, bæði vegna framhjáhalds og annarra mistaka.

Hann er líklega með óvinsælli stjórnmálamönnum landsins. Hann er gjarnan kallaður Tveggja-Jagúara Prescott, vegna þess að skömmu eftir að hann hvatti landsmenn sína til að ganga meira, kom í ljós að hann hafði sjálfur tvær Jagúar bifreiðar til umráða. Aðra notaði hann eitt sinn til þess að láta keyra konu sína eitthundrað metra, frá hárgreiðslustofu og heim.