Gvuuð hvað við erum feitar

Tvær stúlkur við Framingham háskólann í Massachusetts í Bandaríkjunum, urðu skelfingu lostnar þegar þær sáu bera maga sína á forsíðu skólablaðsins. Þær höfðu þó berað maga sína sjálfviljugar, ásamt fimm vinkonum sínum. Það gerðu þær á íþróttakappleik. Þar hvöttu þær sitt lið, en þó einkum einn leikmanninn. Þær skrifuðu nafn hans á maga sér...einn bókstaf á hvern maga.

Með frétt af leiknum var mynd af stúlkunum á forsíðu skólablaðsins. Flestum þótti þetta létt gaman. Ekki þó tveim stúlknanna sem urðu skelfingu lostnar. Þeim fannst magar sínir alltof stórir. Þær gripu til þess úrræðis að reyna að stela upplagi skólablaðsins.

Öryggisvörður við skólann sá hinsvegar bollurnar tvær vera að rogast með blaðabunka á milli ruslatunna, og allt komst upp. Ritstjóri skólablaðsins segir að í gegnum árin hafi áður verið reynt að stela upplaginu. En aldrei af svona heimskulegri ástæðu.