Líbanskir hermenn skutu á mótmælendur

Líbanskir hermenn skutu í dag á palestínska mótmælendur með þeim afleiðingum að þrír létust og að minnsta kosti 20 særðust. Mótmælendurnir voru að reyna að komast í gegnum eftirlitshlið á leið sinni aftur í flóttamannabúðirnar Nahr al-Bared í norður Líbanon.

Vitni sögðu hermennina í fyrstu hafa skotið upp í loftið en þegar mótmælendurnir, sem voru að minnsta kosti hundrað talsins, létu sig ekki hverfa skutu þeir með hríðskotabyssum á fjöldann.

Undanfarnar sex vikur hafa átök staðið yfir í flóttamannabúðunum Nahr al-Bared á milli vígamanna úr Fatah al-Islam og líbanska hersins. Að minnsta kosti 200 manns hafa látist. Þúsundir flóttamanna hafa flúið búðirnar en krefjast þess nú að fá að snúa aftur.