Everton slapp með skrekkinn

Everton er komið í riðlakeppni Uefa bikarsins eftir nauman 2-3 útisigur á Metalist Kharkiv frá Úkraínu í síðari leik liðanna í kvöld. Fyrri leiknum lauk með 1-1 jafntefli og í rauninni var úkraínska liðið óheppið að fara ekki áfram á miðað við gang mála í kvöld.

Metalist réði gangi mála í upphafi leiks og komst yfir með marki frá Edmar. Joleon Lescott jafnaði leikinn fyrir Everton en Hicham Mahdoufi kom Metalist aftur yfir eftir að liðið hafði m.a. átt skot í stöng.

Það voru svo James McFadden og Victor Anichebe sem tryggðu Everton sigurinn með mörkum á 72. og 88. mínútu, en enska liðið getur þakkað fyrir að komast áfram í keppninni eftir að Úkraínumennirnir réðu ferðinni í leiknum - ákaft studdir af brjáluðum stuðningsmönnum.