Charles var eina ást Díönu

Charles var stóra og eina ástin í lífi Díönu prinsessu, að sögn náinnar vinkonu hennar. Hún elskaði hann til síðasta dags og hefði aldrei dottið í hug að giftast Dodi Al-Fayed. Lana Marks veitti Daily Mail einkaviðtal til þess að koma þessu á framfæri.

Hún sagðist veita viðtalið til þess að leiðrétta allskonar bull sem sagt hefði verið um líf og dauða prinsessunnar. Ekki síst væri það Mohammed Al-Fayed, faðir Dodis sem hefði bullað.

Al-Fayed hefur meðal annars sagt að Díana hafi verið ófrísk eftir Dodi þegar hún lést. Hún hafi svarað bónorði hans játandi. Breska leyniþjónustan hafi þá myrt þau að fyrirmælum konungsfjölskyldunnar. Fjölskyldan hefði ekki getað hugsað sér að móðir verðandi konungs Bretlands giftist múslima.

Þetta segir Lana Marks að séu tómir hugarórar. Díana hafi aldrei litið á Dodi sem neitt annað en sumarást sem ekkert væri á bakvið. Hún segir að hún og vinkonur hennar hafi flissað þegar Mohammed Al-Fayed hafi sagt að Dodi og Díana hafi verið búin að velja sér trúlofunarhring. Marks segir að gjöfum hafi verið ausið yfir Díönu á hverjum degi og þótt Dodi hafi ætlað að gefa henni hring þá segði það nákvæmlega ekkert.

Aðrar vinkonur Díönu sem leitað hefur verið til vegna nýjustu rannsóknarinnar á láti hennar taka í sama streng. Og Lana Marks segir að Díana hafi alltaf elskað Charles. Samband hans við Camillu Parker-Bowles hafi hinsvegar gert þeim ókleift að búa saman.