Lundúnalögreglan sektuð fyrir skothríð

Lundúna lögreglan hefur verið sektuð um tæpar 22 milljónir króna fyrir að skjóta saklausan Brasilíumann til bana í járnbrautarlest árið 2005. Það var skömmu eftir árásirnar á samgöngukerfi Lundúna og lögreglumennirnir héldu að Jean Charles Menezes væri hryðjuverkamaður. Hann var skotinn sjö skotum í höfuðið.

Þetta voru mjög óvenjuleg réttarhöld þar sem saksóknarinn sagði að ekki væri hægt að draga neinn einstakling til ábyrgðar. Þess í stað var málið höfðað gegn lögreglunni í heild sinni fyrir að takast ekki að vernda almenning frá hættunum sem stafaði af sjálfsmorðssprengjumanni sem gengi laus.

Lögreglan var sökuð um að brjóta heilbrigðis- og öryggisreglur þegar þeir eltu Menezes langar leiðir og skutu hann loks til bana. Sir Ian Blair, lögreglustjóri Lundúnaborgar sagði eftir úrskurðinn að hann myndi ekki segja af sér embætti.