Farsímatruflarar seljast eins og heitar lummur

Farsímatruflarar seljast orðið svo vel í Bandaríkjunum að farsímafyrirtækin eru farin að hafa af því verulegar áhyggjur. Það er bannað með lögum að trufla farsíma þar í landi og rúmlega 650 þúsund króna sekt við fyrsta broti. Tvö fyrirtæki hafa nú farið fram á að þessu banni verði aflétt undir vissum kringumstæðum.

Flestir þeir sem kaupa truflarana gera það í eigingjörnum tilgangi. Þeir vilja losna við að þurfa að hlusta á aðra tala í farsíma í strætisvögnum, á veitingahúsum, í kvikmyndahúsum og svo framvegis. Truflararnir eru á stærð við sígarettupakka og kosta um 10 þúsund krónur.

Meðal þeirra sem kaupa þá eru veitingamenn, hótelstjórar, strætóbílstjórar, og eigendur hárgreiðslustofa.