Gengur illa að höndla pressuna

Lewis Hamilton verður að útiloka sig frá utanaðkomandi áreiti og einbeita sér að akstrinum ef hann ætlar að berjast um meistaratitilinn í Formúlu-1. Þetta segir Ross Brawn, stjóri Honda-liðsins. Brawn leiðbeinti Michael Schumacher í gegnum svipaða erfiðleika á sínum tíma.

„Aksturinn er það sem máli skiptir þegar allt kemur til alls. Hann verður að einbeita sér að því að sem hann er að gera," segir Brawn en Hamilton hefur ekki náð í stig í seinustu tveimur keppnum og er tíu stigum á eftir forystusauðnum Felipe Massa.

Hamilton hefur viðurkennt að eiga í erfiðleikum með að höndla þá pressu sem er á honum. Hann er ósáttur við umfjöllun bresku pressunar. Hann fær mikla athygli fjölmiðla og virðist eiga í erfiðleikum með að höndla það.

„Við eigum öll til að gleyma því að hann er bara 23 ára, þetta er allt ný reynsla fyrir hann. Það getur í raun enginn hjálpað honum að höndla alla þessa pressu og umfjöllun sem hann fær. Þetta er fylgifiskur þess að hafa svona mikla hæfileika."