Birkir tryggði Bodö/Glimt sigur

Birkir Bjarnason skoraði sigurmark Bodö/Glimt sem vann 2-1 útisigur á Strömsgodset í norsku úrvalsdeildinni í dag.

Birkir kom inn á sem varamaður á 69. mínútu í stöðunni 1-0. Strömsgodset jafnaði á 88. mínútu en Birkir skoraði sigurmarkið á lokamínútunni.

Fredrikstad vann 2-1 sigur á HamKam. Garðar Jóhannesson kom inn á sem varamaður á 63. mínútu og lagði upp sigurmark leiksins aðeins fimm mínútum síðar.

Gunnar Heiðar Þorvaldsson var í byrjunarliði Vålerenga sem tapaði 2-1 fyrir Molde á heimavelli. Honum var skipt af velli í hálfleik.

Theodór Elmar Bjarnason var í byrjunarliði Lyn sem vann 4-0 stórsigur á Álasundi á útivelli. Indriði Sigurðsson lék allan leikinn í liði Lyn en Haraldur Freyr Guðmundsson var ekki í leikmannahópi Álasunds.

Fredrikstad komst á topp deildarinnar með sigrinum í dag en Stabæk getur endurheimt toppsætið með sigri á Rosenborg síðar í dag.

Lyn, Vålerenga og Bodö/Glimt koam þar á eftir, öll með tíu stig. Álasund er í ellefta sæti deildarinnar með sex stig.