Klinsmann: Podolski er ekki til sölu

Jurgen Klinsmann, þjálfari Bayern Munchen, segir að framherjinn Lukas Podolski verði ekki seldur frá félaginu. Podolski fékk ekki mörg tækifæri með Bayern á síðustu leiktíð og talið var nær öruggt að hann færi frá félaginu í sumar.

Klinsmann er nýtekinn við stjórnartaumunum hjá Bayern og ætlar sér ekki að selja framherjann unga, sem hefur m.a. verið orðaður við Juventus eftir að hafa staðið sig vel á EM í sumar.

"Framtíð Podolski er hjá Bayern. Hann á enn tvö ár eftir af samningi sínum við félagið og er partur af mínum áformum. Ég er viss um að hann verður sáttur hérna áfram," sagði Klinsmann um hinn 23 ára gamla framherja.