GIF Sundsvall tapaði aftur

Leikið var í sænsku úrvalsdeildinni í fótbolta í kvöld og nokkrir íslenskir leikmenn voru í eldlínunni.

Ólafur Ingi Skúlason lék allan leikinn fyrir Helsingborg sem vann 2-0 sigur á útivelli gegn Ljungskile. Henrik Larsson skoraði síðara markið í leiknum.

Jóhann B. Guðmundsson var í byrjunarliði GAIS sem vann 2-0 sigur á Hammarby. Jóhann var tekinn af velli á 59. mínútu leiksins.

Helgi Valur Daníelsson lék allan leikinn fyrir Elfsborg sem gerði 1-1 jafntefli á útivelli gegn Malmö.

GIF Sundsvall hefur tapað öllum þremur leikjum sínum til þessa í deildinni en liðið tapaði 1-0 fyrir AIK í kvöld. Sverrir Garðarsson og Hannes Þ. Sigurðsson léku allan leikinn en Ari Freyr Skúlason var tekinn af velli í seinni hálfleik.