Lehman Brothers skellir bandarískum hlutabréfamarkaði

Gengi hlutabréfa í bandaríska fjárfestingabankanum Lehman Brothers féll um 93 prósent við upphaf viðskiptadagsins í miklum hremmingum á bandarískum hlutabréfamörkuðum í dag. Bankinn, sem er fjórði umsvifamesti fjárfestingabanki landsins, lýsti sig gjaldþrota í dag. Gjaldþrotið hefur smitað út frá sér um allan heim. Á sama tíma rauk gengi bréfa í Merrill Lynch upp um 20 prósent eftir að bandaríski bankinn Bank of America lýsti yfir áhuga á að kaupa hann. Gengi bandaríska tryggingarisans AIG hefur hins vegar fallið um 47 prósent eftir að það sagðist hafa leitað eftir 40 milljarða dala neyðarláni til bandaríska seðlabankans. Tryggingafélagið keypti 90 prósenta hlut Novators, félags í eigu Björgólfs Thors Björgólfssonar, í búlgarska símafyrirtækinu BTC, í ágúst í fyrra fyrir 127 milljarða króna. Dow Jones-hlutabréfavísitalan hefur fallið um 2,48 prósent frá því viðskiptadagurinn rann upp vestanhafs í dag og Nasdaq-vísitalan um 1,93 prósent.