Hannes vill ekki fara til annars félags í Noregi

Hannes Þ. Sigurðsson hefur ekki áhuga á að fara til annars félags í Noregi verði hann seldur frá norska úrvalsdeildarliðinu Viking.

Hann sagðist í samtali við Aftenbladet vonast til að þetta mál myndi leysast á næstu vikum.

Hannes hefur verið orðaður við sænska úrvalsdeildarfélagið Sundsvall og má gera ráð fyrir því að hann sé spenntari fyrir því félagi nú þegar að æskufélagi hans úr FH, Sverrir Garðarsson, sé genginn til liðs við félagið.

Egil Östenstad, yfirmaður íþróttamála hjá Viking, segir að félagið hafi ekki fengið tilboð frá öðru félagi í Hannes heldur einungis fyrirspurn frá umboðsmanni sem vildi vita hvort Hannes væri falur fyrir ákveðna upphæð. Östenstad sagði að sú upphæð hefði verið of lág.

Hannes hefur verið orðaður við norsku félögin Tromsö og Molde.