Ökumenn vilja skýrari reglur frá FIA

Samtök Formúlu 1 ökumanna vill fá betri skýrari reglur á borðið frá FIA, eftir að áfrýjunardómstóll FIA staðfesti dóm yfir Lewis Hamilton frá Spa mótinu í Belgíu.

Flestir ökumenn eru þó sammála um að Hamilton hafi brotið af sér, en vilja samt skerpa á ákveðnum reglum. Mál málanna er að fá á hreint á hvaða hátt ökumenn eiga bregðast við ef þeir skera beygjur ótæpilega, eins og Hamilton gerði þegar hann sótti að Kimi Raikkönen á Spa brautinni og komst þar með framúr. Tilskipun var gefinn út á Monza brautinni að ef svipað henti þar, þá ættu ökumenn að bíða eina beygju og reyna svo framúrakstur. Hamilton beið ekki boðanna á Spa og fékk skömm í hattinn fyrir.

„Við verðum að finna betri lausn en að refsa mönnum eftir mót og við erum búnir að ræða þetta við FIA. Það eru núna malbikuð öryggissvæði meðfram mörgum beygjum og freistingin er að nota þau til að skera beygjurnar. Menn gera slíkt ekki þegar það eru grasbakkar meðfram beygjum," segir Pedro de la Rosa um málið. Hann er formaður öryggisnefndar Formúlu 1 ökumanna.

Hann er í Singapúr og hefur skoðað aðstæður á brautinni og telur að engin hætta verði til staðar í mótinu, jafnvel þó það rigni.

Spáð er þrumuveðri um mósthelgina og oftar en ekki rignir á kvöldin á þessum tíma í Singapúr, en allar æfingar, tímataka og kappakstur fara fram að kvöldlagi í borginni. Brautin verður því flóðlýst og er það í fyrsta skipti sem Formúlu 1 mót fer fram á flóðlýstri braut.