Yfir 100 sóttu um stöðu nornar í enskum fjölskyldugarði

Fjölskyldugarðurinn Wookey Hole í Englandi auglýsti nýlega stöðu nornar lausa til umsóknar í garðinum. Yfir 100 sóttu um stöðuna.

Wookey Hole er aðalferðamannastaðurinn við Wells í Englandi en þar eru sögufrægir hellar sem tilheyra fjölskyldugarðinum. Á miðöldum voru hellarnir heimkynni Wookey nornarinnar sem ábótinn í Glastonbury lét brenna á báli til að forða íbúum héraðsins frá göldrum hennar.

Nú er staðan laus. Fyrri norn var að vísu ekki brennd á báli heldur lét af störfum sökum aldurs. Fram kemur í frétt á vefsíðunni e24.no að nokkuð góð laun séu í boði fyrir þá norn sem fær stöðuna eða um 10 milljónir kr. á ári.

Fram kemur í fréttinni að nornin sem ráðin verður muni fá huggulegan helli til að búa í. Hinsvegar verður nornin að hafa gjallandi hlátur og hún má alls ekki hafa ofnæmi fyrir köttum.

Haldin verða opin starfsviðtöl við umsækjendurna í Wookey Hole í þessum mánuði. Þar eiga þeir að leika listir sínar þar á meðal galdra. Um stöðuna geta bæði menn og konur sótt og einnig klæðskiptingar.

En fyrst og fremst verður nornin að vera vinaleg. „Við erum fjölskyldugarður og það má ekki hræða börnin," segir Gayle Penington markaðsstjóri Wookey Hole.