Ferrari forsetinn svekktur útaf Schumacher

Luca Montezemolo, forseti Ferrari eru verulega svekktur að Michael Schumacher getur ekki keppt. Hann segir að Schumacher hafi verið eins og lítill spenntur strákur þegar honum var boðið að keyra bíl Felipe Massa og honum þyki verulega leitt að geta ekki keppt vegna meiðsla sem hann hlaut í mótorhjólaóhappi í febrúar.

Í raun er með ólíkindum að Schumacher skyldi keppa í mótorhjólakappakstri, eins hættuleg íþrótt og það er, eftir að hafa ekið kappakstursbílum sem bjóða upp á mun meira öryggi.

"Schumacher er á annari plánetu, þó hann sé 40 ára gamall. Ég vildi frekar fá meistara í bílinn en nokkurn annan. Formúlan þurfti á endurkomu hans að halda. Við ætlum að berjast fyrir því að fá þrjá bíla á næsta ári frá hverju liði þannig að Schumacher geti keppt þegar hann vill", sagði Montezemolo.

"Ég var mjög svekktur þegar Schumacher hringdi í mig og sagði að hann gæti ekki keppt. En heilsan skiptir öllu máli og læknar fundu eitthvað sem var ekki eins og það á að vera. Schumacher fann fyrir eymslum þegar hann keyrði Ferrari um Mugello brautina. Hann var búinn að missa fjögur kíló og til alls líklegur. Núna leggjum við traust okkar á Luca Badoer, sem hefur verið sannur liðsmaður Ferrari og fornfús", sagði Montezemolo.

Badoer hefur verið þróunarökumaður Ferrari í mörg ár, en hefur ekki keppt í Formúlu 1 í tíu ár. Hann æfði með Schumacher í síðustu viku á kartbíl. 

"Um leið og ég er glaður á fá tælifæri með Ferrari, þá er ég leiður fyrir hönd Schumachers, því hann var verulega spenntur að keppa á ný. Hann hringdi í mig og er boðinn og búinn að aðstoða mig", sagði Badoer.