Sleggjurnar áfram í París

Stóru nöfnin í tennisheiminum komust áfram í aðra umferð á opna franska meistaramótinu sem nú er komið á fullt í París í Frakklandi.

Spánverjinn Rafael Nadal hóf titilvörnina með sigri á Brasilíumanninum Marcos Daniel 7-5, 6-4 og 6-3 og Roger Federer vann auðveldan sigur á Albert Martin frá Spáni 6-4, 6-3 og 6-2.

Nadal hefur ekki tapað í 29 leikjum í röð á opna franska og stefnir á að sigra á mótinu fimmta árið í röð sem yrði met.

Í kvennaflokknum bar hæst að Maria Sharapova komst í aðra umferðina eftir 3-6, 6-1 og 6-2 sigur á Anastasiya Yakimova, en Sharapova er fallin niður í 102. sæti heimslistans eftir langvarandi meiðsli.

Venus Williams fór líka áfram eftir sigur á Bethanie Mattek-Sands 6-1, 4-6 og 6-2.