Erfið ákvörðun að hætta í Formúlu 1

Nick Fry, forstjóri Brawn GP sem hefur forystu í meistaramótinu í Formúlu 1 segir að það hafi verið erfið ákvörðun hjá keppnisliðum að draga sig út úr Formúlu 1 2010 og lýsa yfir vanþóknun á FIA.

"Við höfum reynt að semja við Max Mosley og Bernie Ecclestone í langan tíma, en við náðum ekki markmiðum okkar fram og verðum því að fara aðrar leiðir. Margar mikilvægar ákvarðanir hafa verið teknar án samráðs við keppnsiliðin og því er staðan þessi", sagði Fry um deilur FIA og FOTA og ákvörðun keppnisliða um að stofna eigin mótaröð.

Útspil FOTA gæti þó verið pólítísk aðferð til að þvinga FIA fram á samningaborðið með betri stöðu fyrir FOTA.

"Ég vona að viðræður um málin haldi áfram. Nú er þetta í höndum Max Mosley. Það er ekki hægt að snarlækka rekstrarkostnað eins og FIA vill. Keppnislið eru með starfsfólk með samninga sem þarf að virða", sagði Fry.

Liðin sem vilja stofna eigin mótaröð er m.a. Ferrari, McLaren, BMW og Renault, sem eru allt bílaframleiðendur með hátt í 1000 manna starfslið í Formúlu 1.