Breska fjármálaeftirlitið: Vill harðari reglur vegna íslenska bankahrunsins

Stjórnarformaður breska fjármálaeftirlitsins (FSA), Lord Turner, vill koma á fót nefnd sem hefur vald til þess að taka fram fyrir hendurnar á eftirlitsaðilum einstakra ríkja í þeim tilgangi að vernda þjóðir fyrir bankahruni eins og gerðist á Íslandi á síðasta ári.

Slík nefnd myndi hafa úrslitavöld varðandi eftirlit með alþjóðlegum bankarekstri í líkingu við Landsbankann sem var með útibú í Bretlandi. Eftirlitið var í höndum íslenska ríkisins. Ljóst er að það brást með þeirri afleiðingu að íslenska þjóðin þarf að greiða Icesave og Bretar og Hollendingar töpuðu gríðarlegum verðmætum.

„Stórir bankar, jafnvel miðlungsstórir bankar sem tilheyra EES löndunum geta orðið of stórir til þess að þeim verði bjargað," segir Turner sem telur hættuna enn fyrir hendi. Hann segir að í framtíðinni eigi þau ríki sem hýsa erlenda bankastarfsemi að geta tekið hamlandi ákvarðanir telji þeir banka standa höllum fæti.

Hann leggur til að ESB leiði í lög reglugerð sem gerir ríkjum fært að stofna slíkar nefndir.

Fréttina má lesa í heild sinni hér.