Höll Musterisriddara í Frakklandi er til sölu

Einn af síðustu flóttastöðum Musterisriddaranna í Frakklandi, höllin Chateau de La Jarhte, er nú til sölu. Hægt er að kaupa þessa sögufrægu höll fyrir 5,4 milljónir evra eða um rétt tæpan milljarð kr.

Chateau de La Jarhte var byggð á tólftu öld en þegar þáverandi konungur Frakklands, Filip hinn fagri, og páfinn ákváðu í sameiningu að slátra reglu Musterisriddaranna árið 1307 var höllin einn síðasti áfangastaður þeirra riddara sem sluppu undan hinum fagra og páfanum. Hugsanlega með þjóðsagnakenndan fjársjóð sinn í farteskinu.

Eins og kunnugt er hefur fjársjóður þessi aldrei fundist en samkvæmt frásögn í börsen.dk getur nú einhver áhugasamur keypt höllina og leitað að vísbendingum um fjársjóðinn í henni.

Umhverfi Chateau de La Jarhte er dramtískt en höllin stendur á hæðarhrygg í héraðinu Dordogne með gott útsýni til allra átta. Með í kaupunum fylgir svo 120 hektarar af skóglendi og ökrum. Á nýrri tímum hefur svo 18 holu golfvelli verið komið fyrir á jörðinni.

Í sjálfri höllinni eru 18 svefnherbergi, bókasafn, kapella og mikil lofthæð þannig að hún er talin ákjósanlegur ráðstefnustaður.

Og það fylgir með í fréttinni að sökum fjármálakreppunnar er nú mögulegt að fá 10% afslátt á söluverði hallarinnar.