Sannfærandi sigur og þriggja stiga forusta

Ragnar Sigurðsson og Hjálmar Jónsson léku allan leikinn í vörn IFK Göteborg sem náði þriggja stiga forustu í sænsku úrvalsdeildinni eftir 4-0 heimasigur á IF Brommapojkarna í dag.

Niklas Bärkroth skoraði tvö mörk fyrir Gautaborgarliðið og þeir Pontus Wernbloom og Stefan Selakovic skoruðu hin tvö mörk. Öll mörkin komu í seinni hálfleik.

IFK Göteborg hefur fengið 27 stig út úr fyrstu 12 leikjum sínum eða þremur meira en IF Elfsborg sem er í 2. sætinu. Þetta var fimmti sigur IFK Göteborg í röð í deildinni eða síðan að þeir töpuðu 2-0 á móti Elfsborg í byrjun mánaðarins.