Bankastjórar og stjórn FIH með 400 milljónir í laun

Laun bankastjóra og stjórnar FIH bankans í Danmörku námu 18,3 milljónum danskra kr. á síðasta ári eða rúmlega 400 milljónum kr. Sem kunnugt er af fréttum er FIH nú í eigu íslenska ríkisins í gegnum veð sem Seðlabankinn tók í bankanum fyrir láni til Kaupþings skömmu áður en Kaupþing komst í þrot s.l. haust.

Í úttekt sem Samtök starfsmanna í fjármálafyrirtækjum í Danmörku (Finansforbundet) hefur gert um laun hjá 20 stærstu bönkum Danmerkur kemur fram að hjá helmingi þessara banka jukust launagreiðslur til bankastjóra og stjórna þeirra milli áranna 2007 og 2008. Þetta gerðist þrátt fyrir að hagnaður þessara banka hefði hrunið milli fyrrgreindra ára.

Hjá FIH lækkuðu launin hinsvegar frá 2007 til 2008 um rúm 16% en laungreiðslurnar námu tæpum 22 milljónum danskra kr. árið 2007.

Mesta hækkunin á launum varð hjá Fionia Bank eða um tæp 200%. Þau fóru úr 4,8 milljónum danskra kr. árið 2007 og í 14,3 milljónir dkr. í fyrra. Það vekur athygli að launin hækki svona mikið hjá Fionia í ljósi þess að engu mátti muna að bankinn yrði gjaldþrota í fyrra.

Mesta lækkun á launum varð hjá Roskilde Bank sem varð gjaldþrota í vetur . Þar lækkuðu launin milli áranna um 75% eða úr 12,5 milljónum dkr. árið 2007 og í rúmlega 3 milljónir í fyrra.