Hlutabréf í London á miklu skriði

FTSE 100 hlutabréfavísitalan í London heldur áfram að hækka í ljósi væntinga fjárfesta um að efnahagslægðin í heiminum sé á undanhaldi. Vísitalan hefur hækkað verulega síðan um miðjan júlí og er hún núna kominn yfir 4900 stig.

Viðskiptin á bakvið hækkanirnar á þessu tímabili eru hins vegar ekki mikil þar sem sumarleyfi eru í hámarki á Bretlandi í ágúst mánuði. Sérfræðingar segja að fróðlegt verði að fylgjast með hlutabréfamarkaðinum þegar verðbréfamiðlarar koma aftur til starfa í september. Það er Sky fréttaveitan sem greinir frá þessu í dag.

Þetta er mesta uppsveifla FTSE vísitölunnar í júlí og ágúst síðan vísitalan var stofnuð árið 1984 er haft eftir sérfræðingi í London. Hann telur að þetta sé það sem koma skal og vísitalan muni halda áfram að hækka.

Hlutabréfamarkaðir víðsvegar um heiminn hafa ekki farið varhluta af jákvæðum fréttum frá Ben Bernanke, seðlabankastjóra Bandaríkjanna, um að bandaríska hagkerfið sé að jafna sig auk þess sem fasteignasala var mun meiri en sérfræðingar höfðu áætlað.

Sérfræðingar segja að orð seðlabankastjórans og jákvæðar fréttir af fasteignamarkaðinum í Bandaríkjunum sé rjóminn á ísnum fyrir hlutabréfamarkaði heimsins.