Danski bankatryggingasjóðurinn þarf að borga vegna Straums

Vegna hruns Straums mun danski bankatryggingasjóðurinn (Indskydergarantifonden) þrufa að greiða dönskum sparifjáreigendum hluta af innistæðum sínum í bankanum.

Í umfjöllun um málið í blaðinu Berlingske Tidende kemur fram að þetta verði í fyrsta sinn í 14 ár sem sjóðurinn þarf að borga út fé til innistæðueigenda. Og telur blaðið að þegar upp er staðið muni hrun Straums kosta danska skattgreiðendur og banka milljónir danskra kr.

Ekki liggur ljóst fyrir hve margir Danir áttu innistæður hjá Straumi þegar Fjármálaeftirlitið yfirtók bankann í upphafi vikunnar.

Samkvæmt Berlinske Tidende mun íslenski bankatryggingarsjóðrinn borga fyrstu 156 þúsund dönsku krónurnar, næstu 144 þúsund dkr. kom svo frá danska tryggingarsjóðum og allar upphæðir sem eru umfram 300.000 dkr. eða tæplega 6 milljón kr. munu koma frá sérstökum björgunarsjóð danska bankakerfisins (Finansiel Stabilitet).

Það sem flækir málið að sögn blaðsins er staða íslenska tryggingarsjóðsins og hvort hann geti yfirhöfuð staðið við sínar tryggingar. Sérstaklega í ljósi þess að þrír stærstu bankar Íslands komust í þrot áður en Straumur féll.

Íslensk stjórnvöld hafa hinsvegar lýst því yfir að allar innistæður í Straumi séu tryggar.

Viggo Sörensen skrifstofustjóri danska seðlabankans, sem hefur umsjón með bankatryggingarsjóðnum, segir að þeir hafi þegar verið í sambandi við kollega sína á Íslandi. "Við vonum að sjálfsögðu að Íslendingarnir muni borga," segir Sörensen. "En við erum ekki skyldugir til að draga þá að landi ef þeir geta það ekki."