Pac-Man þurfti að flýja fellibyl í undirbúningi sínum fyrir Cotto

Hnefaleikaþjálfarinn Freddie Roach hefur staðfest að skjólstæðingur sinn Manny „Pac-Man" Pacquiao sé kominn heilu og höldnu til Los Angeles til þess að klára síðustu tvær vikurnar í undirbúningi sínum fyrir bardagann við Miguel Cotto um WBO-veltivigtarbeltið 14. nóvember.

Hinn þrítugi Pacquiao var við æfingar á heimaslóðum í fjallaþorpi einu nálægt borginni Baguio á Filippseyjum þegar mannskæður fellibylur gerði vart við sig en um þúsund manns létu lífið í bylnum og flóðum sem honum fylgdu.

„Við létum fellibylinn ekki trufla æfingarnar og líkamlegt ásigkomulag Manny er alveg eins og ég vil að það sé, fullkomið," lét Roach hafa eftir sér.