Kæra Ferrari gegn FIA dómtekin

Ferrari leggur inn formlega kæru fyrir franskan dómara í dag gagnvart FIA í París í dag. Ferrari liiðið er ósátt við nýjar reglur um rekstrarkostnað sem FIA ætlar að taka í notkun á næsta ári.

Ferrari vill með athugasemdum sínum við dómara hefta það að reglurnar verði teknar í notkun og forsvarsmenn liðsins telja að FIA hafi ekki rétt til að setja þak á rekstrarkostnað keppnisliða, eins og sambandið vill gera. FIA vill setja útgjaldaþak upp á 40 miljónir punda á ársgrundvelli, að frátöldum kostnaði vegna vélakaupa, markaðsmála og launa ökumanna.

Fjölmörg lið eru ósátt við þessa hugmynd, en þrjú lið af sjö eru sátt, þar sem þetta þýðir mun minni rekstrarkostnað. Þá skapar þetta nýjum aðilum tækifæri til þátttöku. Efnameiri liðin telja að útgjaldaþakið muni hefta framför og framþróun í Formúlu 1 og hafa hótað að keppa ekki 2010 ef reglurnar gangi eftir.

FIA hefur þegar sagt að ef það tapi málinu í París í dag, þá verði áfrýjað.