Samkomulag Sviss og BNA: Slakað á bankaleynd

Í mars tilkynntu Svissnesk yfirvöld að þau færu framvegis eftir alþjóðlegum stöðlum um upplýsingagjöf í bankakerfinu. Slíkir staðlar eru ákveðnir af efnahags- og framfarastofnuninni OECD. Sviss er sem stendur á svokölluðum gráum lista stofnunarinnar yfir lönd sem þurfa að auka upplýsingagjöf sína vegna hugsanlegra skattsvikara.

Svisslendingar vonast til að komast af þessum athugunarlista yfir skattaskjól með samvinnuþýðninni. Þeir hafa þó lagt áherslu á að þeir muni aðeins aflétta bankaleynd í einstökum tilfellum þar sem nægjanlegur rökstuðningur liggur að baki.

Svissneski bankinn UBS hefur átt í deilum við bandarísk yfirvöld undanfarna mánuði, en þau hafa krafist upplýsinga um þá viðskiptavini bankans sem grunaðir eru um skattsvik. UBS létu að lokum undan í febrúar og gáfu upp gögn um 300 bandaríska reikningshafa bankans. Síðan þá hafa bandarísk yfirvöld krafist upplýsinga um 50.000 viðskiptavini bankans til viðbótar.

Þetta kom fram á viðskiptafréttavef BBC.