Schumacher möguleiki hjá Mercedes

Mercedes liðið er að skoða fjóra möguleika varðandi ökumanna á næsta ári og ljóst er að Michael Schumacher er einn þeirra.

Nick Fry, framkvæmdarstjóri Mercedes liðsins er á ráðstefnu í Mónakó með fjölda forráðamanna í Formúlu 1 og vildi hvorki játa því né neita að hann væri að ræða við Schumacher um endurkomu með liðinu. Hann býst við að tilkynna ráðningu ökumanns fyrir eða eftir jól.

"Endurkoma Schumachers er áhugaverður póstur og spurningin er hvort fertugur ökumaður getur staðið upp í hárinu á yngri ökumönnum eður ei. Menn á þessum aldri hafa sannað sig í öðrum íþróttum. Ég gantaðist við Mika Hakkinen um daginn að hann ætti að skoða endurkomu líka", sagði Nick Fry.

Nico Rosberg hefur þegar verið ráðinn ökumaður Mercedes, sem áður hét Brawn og varð meistari í keppni ökumanna og bílasmiða. Ljóst þykir að liðið mun aðeins ráða mjög reynda ökumenn og auk Schumachers kemur til greina að ráða Nick Heidfeld sem missti starfið hjá BMW liðinu sem er hætt í Formúlu 1.

Sjá ökumannslistann 2010