Yfir 100 milljarða dollara kröfur í þrotabú Lehman Brothers

Skiptastjórar Lehman Brothers í London telja að kröfur á hinn gjaldþrota banka gætu numið yfir 100 milljörðum dollara. Það jafngildir um 12.600 milljörðum króna.

Fall Lehman Brothers í september á síðasta ári markaði upphafið að hinni langvinnu fjármálakreppu sem heimurinn býr nú við. Fyrrum forkólfar í íslensku viðskiptalífi hafa sumir hverjir sagt að fall hans hafi endanlega knésett íslenska bankakerfið.

Endurskoðunar- og ráðgjafafyrirtækið PriceWaterhouseCoopers starfar fyrir fleiri en eitt hundrað fyrirtæki á Bretlandi og meginlandi Evrópu sem telja sig eiga kröfu á bankann. Því gætu kröfurnar numið yfir 100 milljörðum dollara að sögn PwC. Það er Reuters sem greinir frá þessu í dag.

Kröfurnar eru margar hverjar verulega flóknar en stór hluti þeirra varð til vegna ábyrgða sem móðurfélagið framseldi til dótturfélaga bankans.

PwC hefur látið hafa eftir sér að fyrirtækið sé að vinna með skiptastjórum í hlutdeildarfélögum Lehman Brothers til að skilja bókhaldsaðferðir félagsins til fulls. Sú samvinna ætti að koma í veg fyrir að hlutdeildarfélögin fari í dómsmál hvert gegn öðru.

Starfsmenn, kröfuhafar og aðrir samningsaðilar Lehman Brothers hafa frest þangað til 22. september til að lýsa kröfum sínum í bú bankans.