Fyrrum lögmaður SEC lék forstjóra íslensks vogunarsjóðs

Robert L. Miller fyrrum lögmaður bandaríska fjármálaeftirlitsins (SEC) hefur viðurkennt að hafa tekið þátt í fjármálasvikum með lögmanninum Marc Dreier sem nú afplánar 20 ára fangelsisdóm fyrir svikin. Meðal annars lék hann forstjóra íslensks vogunarsjóðs þegar þeir félagar reyndu að selja falsað skuldabréf upp á 44,7 milljónir dollara eða rúmlega milljarð kr.

Málið hefur vakið mikla athygli vestan hafs og skrifað er um það m.a. á Bloomberg og Reuters. Þar kemur fram að Miller sé þriðji maðurinn sem játað hefur sök í málinu. Réttarhald er hafið yfir Miller fyrir dómstóli á Manhattan í New York.

Deier og Miller reyndu að spranga skuldabréfinu inn á tvo vogunarsjóði. Í samskiptum við fyrri sjóðinn var Miller í gerfi fulltrúa frá kanadískum lífeyrissjóði og í seinna tilfellinu kynnti hann sig sem forstjóra íslensks vogunarsjóðs.

Fram kom við réttarhaldið að áður en Miller hafði samband við seinni sjóðinn í gerfi vogunarsjóðsstjórans hafi Dreier hringt til Íslands til að athuga hvernig veðrið væri í Reykjavík. Kom hann þeim upplýsingum svo til Miller svo hann gæti verið meira sannfærandi í hlutverkinu.

Miller segir að hann hafi fengið 100.000 dollara frá Dreier fyrir þessi viðvik. Miller á yfir höfði sér allt að 25 ára fangelsi en hann vinnur nú með saksóknara málsins í von um að fá mildari dóm. Miller starfaði sem lögmaður SEC á árunum 1983 til 1986.

Marc Dreier var sakfelldur fyrir fjársvik upp á 400 milljónir dollara í gegnum svokölluð ponzi-svik. Deier rak um tíma lögmannsstofu í New York með 25 starfsmönnum en sú stofa er nú gjaldþrota.