Veitingahúsaveldi Gordons Ramsay var á barmi gjaldþrots

Veitingahúsaveldi ofurkokksins og Íslandsvinarins Gordons Ramsay riðaði á barmi gjaldþrots í vor. Ramsay neyddist til að skjóta töluverðum upphæðum af persónulegum auðæfum sínum inn í reksturinn til að halda honum á floti.

Samkvæmt frétt um málið í Dagens Industri nemur upphæðin sem Ramsay hefur notað til þessa rúmum milljarði kr.

Hagnaður af rekstri þeirra veitingahúsa sem Ramsay rekur minnkaði um 90% í fyrra eða úr rúmum 3 milljónum punda og niður í rúmlega 383.000 pund. Á sama tíma minnkaði veltan um 14%.

Ramsay hefur gripið til ýmissa sparnaðar- og hagræðingaraðgerða af þessum sökum. Hann hefur lokað veitingahúsum sínum í París, Prag og Los Angeles, stytt opnunartímann hjá öðrum veitingahúsa sinna og sagt upp um fjórðungi af starfsfólki sínu. Er nú talið að veitingahúsaveldið muni lifa af kreppuna.

Þegar best lét opnaði Ramsay tíu veitingahús á tíu mánuðum og þegar veldi hans stóð sem hæst áður en fjármálakreppan skall á í fyrra voru 23 veitingahús í eigu hans og tengdaföður hans í gengum félagið Gordon Ramsay Holding.