Higuain: Sigurinn sýnir að við getum unnið deildina

Framherjinn Gonzalo Higuain stal senunni þegar hann skoraði tvennu í langþráðum 2-0 sigri Real Madrid gegn Getafe í spænsku úrvalsdeildinni á Santiago Bernabeu-leikvanginum í gærkvöldi.

Higuain lét gagnrýnendur Real Madrid fá það óþvegið í leikslok í gærkvöld.

„Þetta var gríðarlega þýðingarmikill sigur eftir erfiða viku þar sem við þurftum að hlusta á og lesa algjört þvaður um liðið í fjölmiðlum.

Við sýndum það og sönnuðum með þessum sigri að við getum unnið deildina. Við létum það ekki á okkur fá þótt að við höfum spilað manni færri í klukkutíma og við sýndum að við erum með mannskapinn til þess að ná góðum árangri," sagði Higuain í viðtali við Marca í leikslok í gærkvöldi.