Norsk stjórnvöld ganga á olíusjóðinn

Norsk stjórnvöld ætla að ganga á olíusjóðinn í meira mæli en áður hefur þekkst. Þetta kemur fram í fjárlögum norsku ríkisstjórnarinnar fyrir næsta ár. Ætlunin er að dæla olíupeningunum út í ýmis samfélagsverkefni því að atvinnuleysið er enn að aukast frá þeim 3% sem það stendur nú í.

Í frétt um málið á Ritzau-fréttastofunni segir að í eðlilegu árferði noti norsk stjórnvöld um 4% af hagnaðinum frá olíu- og gasvinnslunni í Norðursjónum. Þetta hlutfall var aukið í ár og enn á að bæta við það á næsta ári.

Í upphæðum eru þetta í heild um 45 milljarðar norskra kr. , eða um 990 milljarðar kr., sem nota á af fjármagni olíusjóðsins samkvæmt fjárlögunum.

„Við notum meira af olíupeningunum en í eðlilegu ári svo við getum aðstoðað efnahaginn við að komast á eðlilegt skrið að nýju á með meiri hraða," segir m.a. í greinargerðinni sem fylgir fjárlögunum.

Samkvæmt fjárlögunum er gert ráð fyrir að hagvöxtur í Noregi á næsta ári nemi 2,1% en reiknað er með að í ár nemi hagvöxturinn 0,75%.