Skömm að Piquet fær friðhelgi

Dæmt verður í svindlmáli Renault hjá FIA í dag, en liðið lét Nelson Piquet vísvitandi keyra á vegg í Singapúr í fyrra til að Fernando Alonso ynni mótið. Piquet fékk friðhelgi gegn því að leggja fram skriflegan vitnisburð, en forseti spænska akstursíþróttasambandsins finnst það fásinna.

"Ef ég réði þá fengi þessi strákur ekki að leiða blint fólk um göturnar. Hann græddi á því að brjóta grunnreglur og fékk þess vegna framhaldssamning hjá Renault sem ökumaður og fær greitt til loka þessa árs, þó hann hafi verið rekinn frá liðinu fyrir slakan árangur. Hann hefði ekki átt að fá friðhelgi hjá FIA, en fyrst það var gert ætti að fara í hefðbundið dómsmál við hann", sagði Carlos Gracia, sem er yfir spænska bílasambandinu.

"Það er skömm af því að hann fær friðhelgi. Það er engin tilviljun að hann er búinn að lenda í 17 óhöppum með Renault, hann kann ekki á stíga á bensíngjöfina. Faðir hans hefur enga stjórn á stráknum og saman hafa þeir reynt að gera eins lítið úr öllum og mögulegt er, eftir þetta atvik. Samt sem áður er gott að búið er að losa Renault við Flavio Briatore og Pat Symonds fyrir að svindla til sigurs. Við viljum ekki svona fólk í Formúlu 1", sagði Gracia.

Nelson Piquet og Fernando Alonso voru báðir mættir á fund FIA í París í morgun, þar sem þeir verða yfirheyrðir um gang mála í Singapúr í fyrra. Ekkert hefur komið fram sem vísar í að Alonso hafi vitað af svindlinu.

Keppt er í Singapúr um næstu helgi. Hér má sjá brautarlýsingu